1Jo 5 | EMI | STEP | Lo atoa la ghaikaaia va Iesu Mesaea ia, natuna ila God, me lo atoa la ghaielousia Tamana, la ghaielousia tee natuna atoa.

1 John 5

Niaikaaia ta Natuna ateva God

1 Lo atoa la ghaikaaia va Iesu Mesaea ia, natuna ila God, me lo atoa la ghaielousia Tamana, la ghaielousia tee natuna atoa. 2 Arova ita aielousia me nongonongo usila God, ita kilakila va aue ita aielousia natuna atoa. 3 Tani aielousia God, malloeana va ita aimuli tee voto eaaulia va ita ghelei me inangarina God karika aue aanasa tani ghelei. 4 Ta lo akapa atoa ita ghe lutula ta God, ita ghaapala sesa tale kosa ateva. Ia o lo ateva niapala: ita aikaaia ta God. 5 See ia lo ateva eaapala kosa ateva? Lo ateva nonga eaikaaia va Iesu Natuna ia God.

6 Ia o lo ateva ghe mae sio tale manu ghe ghaala niasuu me tale rae ghe akalala tale aikoto, Iesu Karisto etana, karika ghe mae sio nonga tale manu, ta ghe mae sio tale manu me rae. Isaa o voto Spirit Manga ateva ghe auliaala, ita kilakila va koronna ia, poli Spirit Manga ateva koronna ia. 7 Kotolu voto lotolu aulia ngaotua: 8 Spiriti eteva, manu eteva me rae ateva. ^{▼▼5:7-8Kasina uru ngai laghe pitila tale inangari nge Latin me mene ghaata tale inangari nge Grik laghe pitila auena ta ninamanama 1300, la ghe pitila7Kotolu voto lotolu aulia ngaotu epona liu: Tamana, Inangari eteva me Spirit Manga ateva, me lotolu ghe asokoi eitauaala.8Me kotolu voto lotolu aulia ngaotua tale kosa ateva: Spiriti eteva, manu eteva me rae eteva.} Lotolu ghe asokoi eitauaala. 9 Taumattu ngatoa la aakoronna llo voto taumattu ghe tarala me eaulia. Tale ia o salana atikirighi taumattu etani akoronna llo voto God eaulia ngaotu Natuna, ta poli God koronna ia. 10 Lo ateva eaaiesoa tale Natuna ateva God, ia ghe aiesoaala inangarina ateva God ghe aulia ngaotuela, me lo ateva etam aaiesoa ta God egheelei va God tau nikamekame ia, poli karika eaikaaia llo voto God eaaulia ngaotu Natuna. 11 Me inangari koronna isaa avalua toko, va God angghe tau mae sio etaita maulue ateva tokatoka liu ia, me ia o maulue ateva, ie ta Natuna. 12 Lo ateva eaighui tee Natuna, eghaaghaa maulue ateva. Me lo ateva karika eaighui tee Natuna ateva God, karika aue ghaa maulue ateva.

Airuuruu tale inangari

13 Apitipiti voto toko etaimim lo atoa am aikaaia tale ararina ateae Natuna ateva God tani gheleiem va am rooroo tani kila va maulue ateva tokatoka liu ia, ia etaimim. 14 Ita atoka tuutuuliita ta God va arova ita kolomi righi voto tale aloaloanaane, aue enongota. 15 Me arova ita kila va enongonongota, saa llo ita kolomi, angita kilala va angita ghaala.

16 Arova teva etaimim etara teva nengana o tuena va egheelei ssavoto ateva karika aue katulainia lao tale nimate, elooloo sae mausina, me God aue tau lao maulue etana. Amene aulia lo atoa kaluira ssavoto karika ekaakatulainila lao tale nimate. Ta kateva ssavoto ekaakatulainila lao tale nimate. Karika aue va am looloo sae tale ia o ase ssavoto ateva. 17 Isaa akapaaili sesa gheegheleiaaita, ssavoto, me kasina ssavoto karika ekaakatulainita lao tale nimate.

18 Ita kilakila va lo akapa atoa laghe lutula ta God karika la gheeghelei ssavoto. Natuna ateva God, Iesu etana, eaitarainila, me sesa taumattu ngateva karika erooroo tani ghelei saasakieinila. 19 Ita kilakila va ita kapuna ita God, me taumattu ngakapaaili tale kosa ateva etokatoka tale sarasarakania sesa taumattu ngateva. 20 Me ita kilakila va Natuna ateva God ghe mae sio me ghe tau mae sio alomasaanga etaita va aue ita kila God koronna ia, me ita etana, me Natuna ta Iesu Karisto. Ia koronna ateva God me etautau maulue ateva tokatoka liu ia.

21 Masi natughu etoa, am alekalekaiem tale tootoo goto atoa.